Live mentors komandası Dayaq Xeyriyyə Cəmiyyətinin tabeliyində olmaqla eyni məqsədli fəaliyyətin daha dar, niş kontingentlə daha spesifik xeyriyyə məqsədləri üçün çalışan heyətdən ibarətdir. Məqsədimiz stomatologiyanın inkişafı üçün konfrans və seminarların təşkili və əldə edilən gəlirlərin xeyriyyə məqsədi üçün xərclənməsi ilə həyat xilas etməkdir.  Uca Allahın izni ilə komandamız azyaşlı ehtiyaclı uşaqların müayinə, müalicə, cərrahi əməliyyat olunmasından tutmuş, əməliyyat öncəsi və əməliyyat sonrası qayğılarının çəkilməsi kimi işləri maliyyələşdirmək üçün fəaliyyət göstərir. Kontingentimiz təşkilatçılığını həyata keçirdiyimiz konfrans, seminar və digər bu tipli tədbirlərin iştirakçıları olan stomatologiya sahəsinin beynəlxalq və yerli nümayəndələridir. Stoma tologiya sahəsinin inkişafı və xeyriyyə töhfələrimiz kimi iki qayəsi olan işimiz motivasiyamızın əsasıdır.

Fəaliyyətimizin missiyası stomatologiyanın beynəlxalq və lokal tendensiyasına uyğun mövzularla zəngin faydalı seminarlar və konfranslar təşkil etməklə əldə edilən gəlirlərin xeyriyyə məqsədi üçün xərclənməsi ilə həyat xilas etməkdir. Öz sahələrində uğurları ilə kifayət qədər tanınmış mentorlarımız stomatologiyanın müxtəlif sahələrini əhatə edən xüsusi mövzularla çıxış edərək öz leksiyalarını təqdim edirlər. Onların peşəkar bilik, bacarıq və təcrübələrini paylaşdığı bu faydalı leksiyalardan faydalanmaq istəyən stomatoloq və diş texnikləri bilet alaraq konfransda iştirak etmək hüququ əldə edirlər. Eyni zamanda çox sayda stomatoloq, diş texniki və bu sahənin mütəxəssisləri iştirak edən tədbirimizə stomatoloji şirkətlər də sərgi iştirakçısı kimi qatılırlar. Gəlirimiz sərgi iştirakçılarının ödənişləri və konfrans iştirakçılarının biletlərinin satışından əldə olunan məbləğ hesabına formalaşır və azyaşlı ehtiyaclı uşaqların düçar olduğu xəstəliklərdən qurtulması və həyatlarının xilas edilməsi üçün istiqamətləndirilir.